I love blue dot com adalah media komunikasi bagi anak muda khususnya generasi muda Bali yang berusaha tampil lebih kreatif, inovatif, berwawasan luas… but yang pasti gaul en funky abizz… tanpa melepaskan eksistensinya sebagai generasi muda Bali yang terus berkiprah menjaga kelestarian dan keajegan budaya Bali.

Sabilang nemonin rahina Saniscara Umanis Watugunung, iraga di Bali ngaturang bakti, nunas ica ring Ida Sang Hyang Aji Saraswati. Yen inget Sarasawati, tiang dadi inget teken cekcek. Inguni dugas dadong tiange konden newata tiang maan pitutur ane luwung sajan. Bes luwung pituture ento ngranayang tiang edot nuturin dini di blue sambilang bengong.

Ipidan sabilang ada cekcek mamunyi, tabepekulun Sang Dewata dadong tiang, setata ngucap , ‘ Tu Batara Sang Hyang Aji Saraswati ledang Ratu tedun nyingakin panjak duwe. Jeg sesai-sai dadong tiange ngorahang keto. Mekeneh tiang nakonin sada banggi.

“ Ken Sang Hyang Aji Sarasawati ane orahang dadong tedun ento, Dong? “

“ Ento apa Ida,” pesaut dadong tiange seken sambilange nuding cekceke di temboke.

Kedek ngakak tiang ningeh pesaut I dadong, sada nyautin.
“ Bah, dadong sakit peningalan ene, ento cekcek tuara ja Sang Hyang Aji Saraswati. Tiang anak ajahine di sekolahan, Saraswati ento anak luh jegeg tan kadi-kadi. Metangan patpat, ngisi rebab, ngisi kropak lontar abesik ngajak ngisi kalung. Ida melinggih di duur angsane. Abedik sing mesaih ngajak cekcek”.

“Yening keto tawang cening artine dadi Sang Hyang Aji Saraswati cara ane orahang cening imara ?” saut dadong tiange nantangin.

Jengah tiang nyautin sambilang tiang maca buku.
“ Anak luh jegeg maarti sastrane utawi ilmune ento patutne ngulangunin, liu anake nemenin. Rebabe pinaka lambang sastrane ento nyidayang anggo nylimuran keneh. Yening lontare anak mula tongos sastra. Buain abesik, kalunge ento artine iraga sing lakar taen suud malajah kanti iraga mati. Sastrane ento tusing lakar taen telah pelajahin. Keto nyen Dong”.

“Beh duweg sajan cucun dadonge. Dadong anak tusing nawang ane buka keto. Ane tawang Dadong nak bebalian dogen. Yening Dadong ngae banten Saraswati, isinin dadong jaja Saraswati ane marupa cara cekcek malakar aji baas. Uli ditu dadong nawang cekceke ento ada paiketan ngajak rerainan Saraswati. Yen lanturin buin, makejang ane pelajahin cening di sekolahan ento anak mula medasar uli sastra. Sastrane ento medasar uling aksara. Nah, aksarane ento medasar uli gecek. Aksara apa jek, gambaran apa jek , ane gae cening sinah cening ngae gecek malu. Yening geceke ento gae cening liu cara A dadi ya aksara A. Yen gae cening cara na mamunyi ya na. Keto masih aksara ane lenan. Konyangan ento medasar uli gecek. Geceke sekalane menadi cekcek.

Cek…cek…cekkk… cekkkkk!” saget ceceke di temboke mamunyi.
“ Tu Sang Hyang Aji Saraswati………” sibarengan tiang mesaut ngajak dadua.