I love blue dot com adalah media komunikasi bagi anak muda khususnya generasi muda Bali yang berusaha tampil lebih kreatif, inovatif, berwawasan luas… but yang pasti gaul en funky abizz… tanpa melepaskan eksistensinya sebagai generasi muda Bali yang terus berkiprah menjaga kelestarian dan keajegan budaya Bali.

Sadurunge titiang matur amatra, pinih ajeng titiang nunas ampura ping banget mantuke ring Pak Pos Blue saantukan tan prasida ngerauhin Bale Bengonge puniki sawatara asasih. Wantah titiang wenten kakaryan akidik ring desan titiange ring Ubud. Karyane wantah atiwa-tiwa, tabe pekulun dadong titiang, kalanturin antuk nyekah tur metatah. Sane mangkin meled manah titiang ngaturin parindikan upacara metatah sane sampun lintang punika.

Upacara metatah ring ajeng wantah kasarengin olih 44 diri, punika mawinan pablibagan sane mangkin wastanin titiang metatah massal. Upacarane kalaksanayang sinarengan tur sapaiketan sareng upacara ngerorasin (atma wedana). Genahnyane wantah ring sor petak genah sang pitara malinggih, boya ja ring paumahan soang-soang. Prabea mantuka soang-song sane matatah wantah akidik pisan marupa jinah pada 25,000 Rupiah anggen sarin sesantun sane jagi kaatur mantuk ring para sangging. Pengangge putih kuning pada arangsukan kaangge rikala metatah.

Upacarane kadulurin antuk nuntun dedari ring petak raris nunas ica ring Pamerajan, Paibon tur Merajan Ageng soang-soang. Sesampune wusan kalanturin antuk nunas ica ring Pura Dalem. Sawusan nunas ica, sang sane metatah kapingit, kasengker ring genah sane sampun kawangun. Nenten dados lunga kija-kija tur ngajengang napi-napi. Mangda nenten prasida anake nibenin baya. Acara metatah kalaksanayang magentosan, kakawitin antuk para satria dalem, para gusti lan kacutetin olih para pasek. Wantah wenten kalih bale, asiki kaangge olih sang lanang, sane asiki olih sang istri. Daweg nyantos galah katatah, titiang polih metaken mantuke ring Uwan titiange, "Wa ,wa adi anak agung malunan metatah ? I raga pasek durinan ? Anak mula sing dadi ya anak pasek malunan ?".

"Siing! Yen anak pasek malunan , binjepan sing ya anak agunge maan laadan anak pasek. Uli malu mula sing dadi tungkalikan keto! Dugas I malu buin bin jelekan. Asing-asing soroh nganggo bale niri-niri, kikir niri-niri, sing nyak cara jani mabesikan. Nyeh sorohne maadukan", Uwan titiang nyawis.

Durung puput pablibagan titiang, saget sampun galah titiang katatah. Rikala majalan ka genah metatah, titiang kaapit antuk Uwan-uwan titiange. Jeg sakadi ngapit raja, ngantos kebus dewek titiange. Apang nenten ja prasida anake sane madaya corah, nyakitin dewek titiang. Risedek metatah titiang nenten kadadosang ngidem, yening ngidem sinah baya niben. Gigin titiange wantah kakikir gigis pisan, apang keni kemanten. Kakikir wantah ririgan sane baduur. Titiang taler kauwehin meka angge masuluh, mangda prasida nyingakin gigine sane wawu pisan metatah. Saluwirin dakin gigine kagenahin ring bungkak nyuh gading. Sasampune wuusan titiang kaanter malih ka genahe sane kapingitan. Tan kadadosan makecuh, yening jagi makecuh, mangda ring bungkak nyuh gadinge. Apang tan prasida antuka anake sane madaya corah nibenin baya.

Sane sampun metatah kadadosan ngajeng ajengan sane sampun kasediyang marupa prangkatan. Nanging kenten kari kapingit ngantos acara mapedambel. Nenten kadadosan ka perantenan. Jati-jati pingit wiakti! Polih titiang makeneh newek jagi ngamuktiang, wiakti ja yening titiang ngelaksanayang sane nenten kadadosan titiang jagi katiben baya? Nanging ajerih taler manahe ngelaksanayang, "..jeg saja nyen!" Meled taler manah titiange metaken mantuke ring sapa sira ja uning, napike sarwa sane nenten kadadosang ring ajeng wenten dasar sastrannyane?

Rikala mapedambel titiang kaicen makudang-kudang daging tetandingan pedambelan sane titiang nenten uning napi luire. Nanging prasidha titiang ngerasayang makudang-kudang rasa, wenten pait, manis, masem, pakeh lan sane tiosan. Sangging sane medambelin titiang nuturin titiang asapuniki :
"Ngawit mangkin sampun cening patut ngerasayang makudang rasa idup sane sujati. Dumogi prasidha uning sane encen sane becik tur tan becik, sane encen patut tur tan patut".


--bli sopir bemo--