I love blue dot com adalah media komunikasi bagi anak muda khususnya generasi muda Bali yang berusaha tampil lebih kreatif, inovatif, berwawasan luas… but yang pasti gaul en funky abizz… tanpa melepaskan eksistensinya sebagai generasi muda Bali yang terus berkiprah menjaga kelestarian dan keajegan budaya Bali.

A sasih sane jagi rauh, ring banjar titiange jagi kawentenang upacara ngaben ‘massal’. Wantah dresta ring banjar titiang, ngaben kelaksanayang nyabran limang warsa mantuke ring para walaka. Warsane sane mangkin, sawa sane jagi kaprateka wenten makuweh pisan, ngerauhin petang dasa sawa. Paruman banjar sampun kelaksanayang saking a sasih sane sampun lintang. Daweg irika kasungkemin mungguing galah pengabenan tur prawartaka karya. Sane dados pangarep ring kekaryan wantah pupulan, inggih punika para kaluarga sang sane meduwe sawa.

Pinaka krama pupulan patut ngarombo sahananin pekaryan tur prabea. Prabea kapolihin saking peson-peson krama pupulan minakadi tiing, baas, nyuh, taluh, punyan buah, klabang, busung, ron muah jinah. Yening saluwiran papeson punika kadruwenang antuk numbas kirang langkung dasa juta telas. Nika durung prabea ngundang semeton lan braya saking dura desa mangda prasida rauh nyaksinin. Acara ngundang puniki jagi kelaksanayang antuk soang-soang kaluarga. Tur pet prade wenten kaluarga sane arsa ngaryanin wadah marupa lembu, punika taler kakaryanin soang-soang. Pamuputne sinah sampun nenten akidik penelasang ipun. Nanging kenten, kaluargan titiang merasa gargita nyangra yadnya puniki riantukan sarwa peson-peson punika satiosan ring jinah prasida karuruh ring tegalan gelah kaluarga. Nenten numbas malih!

Titiang merasa gargita, i dumun kaluargan titiang nenten sareng ngadep tanah tegalan ring abing tukad Ayunge. Akeh pisagan titiange kadropon ngadol tanah tetamian ipune jagi kaanggen genah hotel. Sane mangkin sarwa papeson inucap patut kapolihin antuk numbas. Sinah sampun maal! Men, ring dija ngarereh tiing, nyuh tur saluwir ipun yening tanah ipune sampun telas kaadol.

Panggihin titiang wenten pisagan titiang sane dumun sampun ngadol tanah ipune, sane mangkin merasa meweh nyanggra upacara puniki. Kocap jinahne sane dumun sampun telas kaanggen menahin merajan ipune, numbas mobil lan makuwehan telas ring tajen. Sane mangkin ipun jagi ngadol tanah teban ipune mangda prasida naur utang ring anak lingsir ipune antuk ngaben sane pinih utama, ngangge lembu sane ngredep, ngundang saluwirin sane kauningin. Duh………..!

Yening titiang belog minehin, ngelaksanayang ngaben wantah jalaran naur utang mantuk ring anak lingsir sane sampun ngrewidiang iraga pinaka guru rupaka. Yening nenten iwang antuk titiang matur, punika kabaos Pitra Rna. Sane mangkin, yening utang punika kataur antuk ngadol druwen anak lingsir sane jagi kakaryanin, nenten gelah iraga padidi, nenten dakin limane padidi, boya ja punika ten naur utang wastan ipun. Boya ja punika wantah matetulung kemanten mantuke ring anake lingsir, ngadolin druwen idane santukan ida nenten prasida maadolan ring sunia loka!

Pastika sampun jinah sane kapolihin saking ngadol tanah makuweh pisan. Nenten ja telas sami anggen ngaben. Sinah sampun kari makuweh sane masisa. Jagi kaaturang ring anak lingir sane sampun mantuk ? Janten sampun nenten! Jeg kaangge ja ring perti sentana sane kari maurip, anggen numbas mobil, anggen metajen! Yening kenten ja, matetulung ngadolin tanah nenten patut kocap, saantukan sampun polih upah maduluran antuk jinah sisan pamelin tanah. Sampun ja meled manahe jagi ngelaksanayang Pitra Yadnya nanging yening pamargine asapunika sakadi pisagan titiang, kemanah antuk titiang belog, sinah sampun pocol !

Inggih, amunika titiang prasida matur, sane mangkin punapi pikayun ida dane pamilet iloveblue sareng sami indik pikobet ring ajeng??! Durusang……………!!


--bli sopir bemo