I love blue dot com adalah media komunikasi bagi anak muda khususnya generasi muda Bali yang berusaha tampil lebih kreatif, inovatif, berwawasan luas… but yang pasti gaul en funky abizz… tanpa melepaskan eksistensinya sebagai generasi muda Bali yang terus berkiprah menjaga kelestarian dan keajegan budaya Bali.

Kirang langkung kalih sasih sane sampun lintang ring banjar titiange, Tanggayuda-Ubud, kawentenin upacara masupatiang rangda.

Banjar titiange wiaktine sampun meduwe sasuhunan sane matapakan rangda asiki. Nanging saantukan pamangkune polih pawisik tur kasungkemin antuk paruman banjar, kramane sami cumpu mangdane nangiang sasuhunan rangda malih asiki manut ring pawisik inucap.

Taru sane jagi kaanggen prerai rangda kaambil saking taru jepun sane mentik ring sajeroning silih sinunggil pura sane wenten ring wawengkon banjar titiange. Daweg ngambil tarune punika, aci marupa aci atur piuning taler kagelar. Kramane sami rauh ngaturang bakti tur karauhin taler antuk manggala Puri Ubud sane jagi ngaryanin tapakan rangda punika.

Tapakan rangda prasida kapuputang ring sajeroning kalih dasa rahina. Salanturipun, kalaksanayang upacara pasupatian rangda sane katah kabaos ngerehin rangda. Tatujon upacara puniki wantah nunas mangdane Ida Batara ledang tedun tur malinggih ring tapakan inucap. Eedan upacara puniki kaenter antuk Ida Anake Lingsir saking Sanur. Upacara kakawitin antuk muspa, pawintenan mantuk ring sang sane kajudi jagi ngayah mundut, pamelaspas tur pangerehan ring Pura Dalem.

Daweg upacara pangerehan, sang sane mundut karauhan. Puniki kaangge ciri, Ida Batara ledang nedunin tur malinggih ring tapakan rangda punika. Antuk baos Ida Anake Lingsir, Ida Batara sane malinggih ring tapakan inucap maparab Ida Batara Cakra Geni. Salanturne, ring dauh tengah lemeng, tapakan kairing lunga ka setra, jagi nunas caciri sane siosan. Tapakan kegenahan ring tengahin setra. Kramane sami nenten dados nampek. Sareng sami mangadane nonton saking doh. Dewek titiange nenten nyingak ciri sane kaaptiang, nanging wenten krama sane nyingak ciri marupa api tedun saking langit runtuh ring tapakan punika.

Gelisang carita, sane mangkin tapakan rangda punika sampun kasungsung ring Pura Dalem, kamanggeh Sasuhunan Ida Batara Cakra Geni. Napike sami kramane jati-jati cumpu tur percaya ring tapakan sane anyar puniki pinaka linggih Ida Batara? Titiang newek nenten purun nyawis. Punika mawali ring pikayunan krama ring banjar titiange suang-suang.


-bli Sopir Bemo