I love blue dot com adalah media komunikasi bagi anak muda khususnya generasi muda Bali yang berusaha tampil lebih kreatif, inovatif, berwawasan luas… but yang pasti gaul en funky abizz… tanpa melepaskan eksistensinya sebagai generasi muda Bali yang terus berkiprah menjaga kelestarian dan keajegan budaya Bali.

…….geginane buka nyampat
anak sai tumbuh lulu
ilang lulu buke katah….

Nenenan gegendingan anake malu. Gendingane aluh, elah baan ngendingan. Kewala yening pedasin adeng-adengan lakar liu tepukin piteket-piteket ane pinih luwih. Mirib piteket ane sedeng pedasin tepengane jani sing ada len unduk lulune ane tusing suud-suud ada. Sampatang abesik siu ane lakar ada. Sampatang buka asiu duang tali ane lakar meuyag.

Yening ipidan suud nyampat, lulune punduang di natahe , saup entungan ke taba, urug di bangbange. Antosin abulan, iya lakar dadi beberakan, tumbuh buin ulian entik-entikan.

Mentik ya di punyan nyuhe, alih busung ngajak slepane anggo canang, anggo mungkus bantal, anggo klabang, anggo kompek, anggo jajaitan sewai-wai. Alih tapisne anggo takilan, anggo saringan apa luire. Alih sesehne anggo lakar saka. Alih nyuhne anggo lengis laut pesan clengis, dading saur, dadiang sate lilit. Alih sambukne anggo mapunpun. Alih kaune anggo cedok, anggo piring, anggo sendok nasi, aluh.

Mentik ya di punyan biyune, alih done anggo tekor, anggo takir, anggo ngaput tape. Alih biyune goreng, jaen, anggo sang lawe masih jaen. Alih punyane ane nguda anggo ares, jaen pesan “nyaem”. Tektek punyane ane suba suud mabuah, lalab, baang kucit, baang sampi. Sampi kucite mokoh megledoran.

Mentik ya di punyan tiinge, alih ane lengkong anggo penjor. Alih embungne anggo jukut, alih ane nguda anggo tali anggo bedeg. Alih ane cenik leser anggo iga-iga umah. Alih ane wayah kereng anggo prantos apa luire.

Suud anggo konyangan dadi ya buin lulu, entungan awag. Buin sampatang punduang tanem, buin ya mentik, tumbuh.

Keto nyen ipidan. Ane jani sing jeg len.…………….
Makejang madadi sarwa plastik.
Klabang madadi terpal. Bantale pulung-pulungana kaput baan plastik. Kompeke madadi dompet. Takilan madadi plastik kresek, jang di kulkase. Seseha madadi saka beton. Saluir kau madadi saluir plastik, piring plastik, cedok plastik, sendok plastik.
Tekor madadi kertas minyak, nyelig. Takir madadi cawan. Tape kabungsel-bungselan di plastik kiloane. Dija men ngalih tape jaen men.
Tali tiing madadi tali rapia. Agute neh ngelah pipis anggo meli. Ulian liu ngelah pipis apa ulian sing bisa nyebit tali tiing ?!

Suud anggo koyangan, dadi ya lulu, masih entungan awag. Masih sampatang punduang tanem. Ene ba madan sugih duweg kala lengeh.Sugih ngidayang meli, duweg nganggo sarwa plastik kewala lengeh ngentungan nanem lulu plastik. Nah, sing ba mirib lengeh anak kewala sing pati runggu. Sing rungu lulu plastike ento suba madadi krana. Krana tanahe sing dadi entikan apa, krana ada banjir blabur dini ditu. Yening parilaksana ane buka kene sing suud-suud kapiara sinah suba telah Balinese rurug lulu.

…geninane nguyag lulu
ya lengeh sing pati rungu
lulu liu sing ka tanah….